Uzyndyǵy 32 metrdi, eni 7 metrdi quraıtyn, 14 ekıpaj múshesine arnalǵan «Alataý» kemesi vakýýmdyq ınfýzııa ádisi qalyptamasynda negizdelgen tutas shynyplastıkalyq korpýsqa ıe. Keme mına izdeýge arnalǵan aıryqsha batystyq quraldarmen jabdyqtalǵan tolyqqandy mına tartqysh-izdeýshi bolyp tabylady. Mına-tartqysh kemeniń ekıpaj músheleri Sankt-Peterbýrg qalasyndaǵy Áskerı-teńiz akademııasynda tájirıbe jınaqtady. Jaýyngerlik keme bolǵandyqtan jaýyngerlik kezekshilikte bolady, biraq onyń kezekshiligi beıbit zamannyń enshisinde. Keme jýyrda ǵana Aqtaý portyn soltústik baǵytta keńeıtý jumystaryn zertteýden oraldy.
Aqtaý teńiz portynda ótken kemege tý tabystaý sátine Mańǵystaý oblysynyń ákimi Eraly Toǵjanov jáne QR Áskerı-teńiz kúshteriniń Bas qolbasshysy, vıse-admıral Jandarbek Janzaqov qatysty.
- Búgin «Alataý" mına tartqyshy Mańǵystaý oblysyna kelip toqtady, bul – aıtýly oqıǵa. Kemede kóterilgen áskerı-teńiz jalaýy Elimizdiń memlekettik shekarasyn, qoǵamdyq kelisimin jáne turaqty damýyn nyǵaıtýǵa baǵyttalady. Mańǵystaý – Kaspıı teńizi jaǵalaýynda ornalasqan jáne memleketimizdiń barlyq áskerı-teńiz kúshteri shoǵyrlanǵan jalǵyz oblys, - dedi keme ekıpajyn quttyqtaǵan Mańǵystaý oblysynyń ákimi E. Toǵjanov. QR Áskerı-teńiz kúshteriniń Bas qolbasshysy, vıse-admıral Jandarbek Janzaqov jalaýdy keme komandıri, kapıtan-leıtenant M.Baımuhanovqa tabystady. Sondaı-aq, «Alataý» kemesimen tanysý barysynda aımaq basshysy E. Toǵjanov qurmetti qonaqtar kitabyna ekıpaj tartqyshyna arnalǵan óz tilegin jazyp qaldyrdy.
Gúlaıym Shyntemirqyzy,
«Egemen Qazaqstan».
Mańǵystaý oblysy